• PLAN DI AKSHON
    MFK 2016
  • flag-curacao flag-holanda
Home Gilmar "Pik" Pisas “Piská ta muri pa su boka”, Minister Navarro atrobe

pik_pisas

Nos tur por kòrda kon Minister di Hustisia, poko ten pasá a hasi e ekspreshon pa atrakadornan “Fasten your seatbelt”. Despues at’é atrobe ta bisa polisnan pa tira dirigí, mientras ku Minister Navarro sa bon bon, ku polisnan no tin material adekuá pa enfrentá e ola di kriminalidat kresiente.
Kada bia’ ku e Minister a habri boka, su ekspreshonnan a krea mas pániko i inseguridat den nos komunidat.

Si no ta basta, nos Minister di Hustisia, atrobe ta bolbe hasi mas ekspreshon ku ta hinka su mes den mas problema.

Últimamente durante un redada den prizon, personal di prizon a konfiská dos arma di kandela. Akshon di e trahadonan ku ta di aploudí, paso e arma ei por a forma un peliger pa tantu e wardadó di prezu i e prizoneronan mes. Den prizon tur hende mester por sinti nan mes seif tur momento. Semper m´a boga pa traha un prizon nobo, paso e prizon na Kura Specht, debí na su struktura bieu, den un bachi remodelá, lo keda funshoná ku mesun defektonan di semper. Esaki ta trese peliger pa tantu bishitante, wardadó di prezu i e prizonero mes.

Kedando riba e tópiko, ta remarkabel ku na momento ku a aserká Minister di Hustisia tokante e hayasgo di e arma di kandela den prizon, Minister Navarro mesora a sali den medionan di komunikashon i mustra dede den direkshon di e wardadónan di prezu.
Minister Navarro a bisa ku ya kaba ela yega di bisa ku ta wardadornan di prezu ta hinka droga i arma den prizon i ku e biaha aki ta nan a bolbe hinka arma den prizon. Segun Minister Navarro, esaki debí ku e área kaminda a haña arma ta area ku supuestamente ta wardadornan di prezu so ta bai. Minister Navarro no por mustra dede òf mihó bisa den e kaso aki akusá e wardadónan di prezu, sin ku e investigashon a tèrminá. Tur hende ta inosente te ora hues imponé un kastigu riba e persona. Ami no tei pa defendé niun hende. Si a kometé un akto robes, ta e hende mes mester sinta riba su blarnan, pero ta sumamente inhustu sali mustra dede i akusá hende, sin ku a pasa den un proseso di investigashon.

Pa esnan ku no sa bai nos instituto korekshonal, pa drenta eiden, na porta ta un kontròl rigoroso ta tuma lugá. Ta masha difísil pa pasa ku algu ilegal bai paden. Si resultá asina tòg ku tin kosnan ilegal a tuma lugá, mester amplia e investigashon pa tèrminá ku ilegalidat den prizon “for once and for all”.

Ademas mester tene kuenta ku no ta wardadó di prezu so ta drenta e instituto, tin diferente vehíkulonan i òf personanan ku ta bai paden, por ehèmpel traha riba defektonan den prizon. Anto pa esnan ku no sa, prizoneronan ta bishitá den diferente área den prizon sea pa bai por ehèmpel lès di kòmpiuter, kushina, gym, etc. Ta p’esei mi ta bolbe konstatá ku Minister Navarro a bolbe papia kos sin pensa, paso ta inhustu pa komo titular di Hustisia, sali i ataká un grupo so, sin e investigashon a tèrminá.

Mi ta bolbe manda un mensahe pa e Minister Navarro, por fabor papia ménos i produsí mas, ya asina tantu den nos komunidat i tambe den nos prizon por reina un poko trankilidat.

Gilmar Pik Pisas
Miembro di Parlamentu Frakshon MFK

Webmaster

Leave a Reply