• PLAN DI AKSHON
    MFK 2016
  • flag-curacao flag-holanda
Home Amerigó Thodé PIENSA EL LADRÓN QUE TODOS SON DE SU CONDICION

Aparentemente Parlamentario Mac Cijntje di Pueblo Soberano no tin muchu kos di hasi. Pa e por haña atenshon di prensa e mester mete ku MFK i den e kaso aki ku mi persona dor di tira ku lodo sin presentá hechonan konkreto ni prueba. E ta blo papia pa papia numa, prietpraat so ta sali di su boka, djis pa tapa nan inkapasidat di goberná un pais. Pueblo Soberano tur dia di nobo ta duna muestra ku loke ta trata nivel no ta nada otro ku un nivel baho i tiramentu ku lodo sin presedente so nan ta kapas di dje.

Ora bo ta bini ku insinuashonnan dilanti, bo mester bin papia dokumentá i ora bo ta mustra dede riba un otro kòrda ku tres otro dede ta mustra den bo direkshon. Pero aparentemente ta den e direkshon aki i riba e nivel aki Parlamentario Mac Cijntje ke move pa haña atenshon públiko.

Ta ki barbaridat baho Parlamentario Mac Cijntje a bin ku n’e na sede di Pensamentu Stom ku ta PS- Soberano City?
Na mart di 2013 mi a hasi pregunta den Parlamento na Minister Navarro tokante ‘seguridat’ ku un miembro so di Parlamento, sr. Wiels tabata haña. Mi a puntra ku ta bèrdat un miembro di Parlamento tin protekshon i pa ki motibu (menasa) i ki tabata e gastunan envolví. Esakinan ta preguntanan legítimo di un parlamentario na un Minister di Hustisia, en bista ku ta sr. Wiels so tabata e úniko parlamentario ku for di e tempu ei tabata risibí e protekshon aki. E dia ei den Parlamento Mac Cijntje no a bisa ni hasi nada pa protekshon di su lider paso ta kasualidat ku Parlamentario Mac Cijntje tabata sa anto for di e dia ei ku su lider polítiko tabata kore riesgo i ta awe numa e preguntanan aki ta motibu pa e insinuashon baho ku, komo ku e no ta kere den kasualidat ora tin otro posibilidatnan, pa tira den mi direkshon ku a mata Wiels promé ku 5 di mei 2013. Si ta insinuashon ta prueba i no echos nos por puntra sr. Parlamentario Cijntje:

-Ta kasualidat ku ta awor numa, despues di 15 luna, Parlamentario Mac Cijntje ta bin ku su komentario i no den Parlamento na mart 2013? Òf tin otro posibilidat?

-Ta kasualidat ku ora na mart 2013 mi a sugerí pa duna sr. Wiels mas siguridat, ni Parlamentario Mac Cijntje ni tampoko partido Pueblo Soberano no a habri nan boka i apoyá esaki, manera por spera di hende ku tin nan lider na pechu, paso awe porta su lider tabata na bida? Òf tin otro splikashon pa esaki?

-Ta kasualidat ku dia di e asesinato di sr. Wiels e tabata sin seguridat i ku su siguridat a haña dia liber kaminda Parlamentario Mac Cijntje i tambe partido Pueblo Soberano tabata na altura di esaki nan no a soru di pone un otro siguridat na su lugá pa e keda ku e protekshon nesesario, ku ta e kos korekto i responsabel ku mester a hasi, siendo ku Parlamentario Mac Cijntje i Partido Pueblo Soberano a laga nan lider sin protekshon e dia ei? Òf tin otro posibilidat?

-Ta kasualidat ku dia di su asesinato ta hendenan di partido di sr. Parlamentario Mac Cijntje tabata na altura presis dor di kontakto selular ki momento sr. Wiels tabata na unda ku ken i kon? Òf tin otro posibilidat?

Tambe Parlamentario Mac Cijntje ta bisa ku dia di morto di su lider mi tabata eibou na MariePampoen hasta promé ku ambulans i e no ta kere den kasualidat.

-Pero ta kasualidat ku e ta lubidá bisa ku ami a bin haña Parlamentario Mac Cijntje ’é  mes ei bou. Ta pa kasualidat e tabata ei bou asta promé ku mi òf tin otro posibilidat i p’esei no ta kere den kasualidat?

-Ta kasualidat ku Parlamentario Mac Cijntje a pidi e minister di hustisia despues di morto di su lider polítiko un vergunning pa karga arma i protehá e mes i su famia kontra pueblo di Kòrsou ku e a haña tambe, armando su mes kontra pueblo di Kòrsou? Òf tin otro posibilidat?

-Ta pa kasualidat e ta den un Gobièrnu ku despues di 15 luna  no por a yega na solushon di e kaso-Wiels? Òf tin otro splikashon?

– Ta pa kasualidat e i tur sobra miembro di koalishon tin protekshon di 24 ora ku 2 òf tres hende di siguridat i tambe arma na nan disposishon pa nan protekshon i di nan famia; pero Parlamentario Mac Cijntje no ta kere den kasualidat!

thode_parlamento_10april2014

Webmaster

Leave a Reply