• PLAN DI AKSHON
    MFK 2016
  • flag-curacao flag-holanda
Home Gerrit Schotte Spich Gerrit Fransisco Schotte awe 2 di Yüli 2015 – Dia di...

Koleganan, Pueblo di Kòrsou Felis dia di Bandera.

31 aña dia di bandera, 31 aña ku mesun problemanan den nos komunidat, sin ku ta logra resolvé nan realmente.

Pueblo di Kòrsou no ta kontentu ku nos trabou di e último 31 lunanan.

Pueblo ta desapuntá ku resultado di nos polítika di e último 31 lunanan. Pueblo ta desapuntá ku e trabou parlamentario. Pueblo ta desapuntá ku maneho di gobièrnu e último 31 lunanan.

31 aña dia di Bandera…, kiko e selebrashon akí lo mester nifiká? Un bandera, símbolo di un nashon, ta marka union di un nashon henter aña, tur aña. Awor, tur aña ku nos topa dilanti di nos bandera, nos tur ta spera sinseramente ku e sintimentu di union i alegria ku ta reina na Brionplein lo konkretá den e boluntat pa nos tur huntu ku gobièrnu kontribuí na solushon di e problemanan importante den nos pais.

Uni bou di nos bandera awe dia 2 di yüli ta generá den nos tur – yu di e tera akí -, e afan pa skohe lider di un gobièrnu nobo ku un tim ku efektivamente ta trese solushon pa e problemanan ku ta montonando den e pais akí.

Awe 31 aña despues ku nos a skohe i kuminsá selebrá dia di bandera, nos ta bibando bou di nos bandera ku problemanan ku kada aña ta birando mas insoportabel pa komunidat.

Bandera di Kòrsou ku su kolónan, i su dos streanan t’ei pa kòrda nos ku nos mester defendé nos derechonan i nos patria i no aseptá ku niun hende ta trapa riba nos. Gobièrnu i Parlamento t’ei ku enkargo di pueblo pa defendé honra di nos pais i garantisá ku ta bini progreso na nos dushi isla Kòrsou pa henter pueblo, bou di nos bandera respetá.

Awor…nos tin ku bolbe konstatá ku esaki no ta tumando lugá, ni den e konstelashon anterior antiano, ni tampoko awe den e konstelashon nobo negoshá durante e proseso di ‘Slotverklaring’.

Awe ta mas bisto ku nunka, ku nos sistema demokrátiko… nos sistema polítiko, ta un “broeikas”, un foko di intriga, di odio, konspirashon kontra deseo di pueblo, falsedat, mannan sushi ku ta trata tur dia di nobo di logra nan ophetivo enbes di laga demokrasia atendé ku agènda di prioridatnan di nos pueblo. I asina nos por sigui menshoná tur e atrosidatnan ku awe ta stroba deseo di pueblo.

Pueblo lo selebrá awé su dia di bandera. E lo selebr’é den su kas huntu ku famia den su bario, na Bándabou, Bándariba, p’e sinti otro airu, un airu di trankilidat, un airu di felisidat no opstante e echo ku nos no ta felis. E felisidat akí no t’ei den nos pueblo su kurason. Hopi mama i tata ku a pèrdè trabou, studiantenan ku a bolbe kas kaminda awe oportunidatnan ta skars den un ekonomia paralisá… Anto e inseguridat reinante serka nos pueblo den tur bario di Kòrsou ta buta ku interes di bai nos plasa prinsipal Brionplein no ta biba den kurason di nos pueblo.

Ohalá awe 2 di yüli 2015 por tabatin un realidat mas positivo pa menshoná. Mi tin ku lamentá sin embargo, ku nos no a yega einan ainda i ku ta kambionan transendental den nos sistema polítiko lo tin ku tuma lugá, promé ku nos pueblo lo por biba trankil bou di bandera di Kòrsou. …Biba den e mihó Kòrsou posibel!

Gerrit Fransisco Schotte

Dia di Bandera

2-07-2015

IMG_1828#1Diseño bandera

#GFS2016 #MFK

 

Webmaster

Leave a Reply