• PLAN DI AKSHON
    MFK 2016
  • flag-curacao flag-holanda
Home Gerrit Schotte Staten resientemente a aprobá 3 moshon ku instrukshon na Minister i Gobièrno,...

Initiatiefrecht di Staten ta prerogativa di Staten i den e kaso di 21 aña negligensha EOP, Staten a disidí ku NO MAS!

Frakshon di Movementu Futuro Kòrsou (MFK), a tuma nota den diferente medionan di prensa, komentario i splikashon di eksponentenan di Partido Nashonal di Pueblo (PNP) pa loke ta trata e moshon ku frakshon di MFK i Pueblo Soberano a presentá den Parlamento pa duna un inisio real na e trayekto pa remplasá e Eilandelijke Ontwikkelingsplan (EOP) ku nos tur na Kòrsou sa, ku e plan aki su úniko kontribushon ta ku nos ekonomia a wòrdu frena dor di limita desaroyo urbano i tambe stroba konstrukshon di kasnan pa pueblo.

E meta tras di e moshon aki ta unu noble, kaminda dos frakshon pa añanan a bin ta traha pa kambio di nos EOP, a disidí di presentá un moshon pa asina por kuminsá ku un trayekto di kambio ku lo mester bai aportá na yuda trese mas desaroyo ekonómiko pa nos dushi Kòrsou i habri kaminda pa konstruí barionan sostenibel pa nos yunan di Kòrsou. Masha hopi diputado i minister di turno a primintí ku nan lo entamá e trayekto pa un kambio di EOP pero te awe ningun no a hasi nada konkreto. Si awe PNP ta mira e moshon komo un “fastball” òf anti konstitushonal ta pasombra pa PNP interes partidario ta riba interes general.

Un di e puntonan di kritiká di parti di PNP ta ku konforme nan interpretashon, no por duna instrukshon na un minister. Ta ku asombro nos di MFK a tuma nota di e argumentá aki, debí ku na vários okashon (al ménos 3 biaha, 19 di novèmber 2015 https://www.scribd.com/document/332765086/Moshon-19-Nov-2014, 9 di yüni 2015 https://www.scribd.com/document/332765111/Moshon-9-Juni-2015 i 24 di ougùstùs 2015 https://www.scribd.com/document/332765121/Moshon-24-Oug-2015 ) frakshon di PNP a sostené moshonnan kaminda den e formulashon di e moshonnan ta uza e palabra instruí, pa referí na un deseo/mandato di Staten pa un minister òf gobièrnu den su totalidat ehekutá un moshon (mira kopianan athunto), ta dikon awor ku trata di un minister di PNP e palabra instruí ta inkorekto i ta hasi ku e Moshon ta anti-konstitushonal. Un di 4 moshon di 22 di yüni 2016 https://www.scribd.com/document/332765153/Moshon-22-Juni-2016

Pa loke ta trata e suma pa kubri e gastunan, ta bon pa rekordá ku e órgano ku tin outoridat riba presupuesto ta Parlamento di Kòrsou, si den e moshon parlamento a bai di akuerdo ku un suma ku mester wòrdu manehá dor di Griffie pa enkaminá e proseso pa yega na un formulashon nobo di EOP no ta nada inkonstitushonal, debí ku ta ehekutando un di su derechinan ku ta ankra den nos konstitushon esta “Budgetrecht”.

Na un radio emisora nos por a skucha sra. Camelia-Romer argumentá ku a manda dies empleado públiko Qiuto Ecuador i ku e empresanan menshoná den e moshon tur ta kompanianan merikano ku no sa nada di Kòrsou. Awe nos ta konstatá ku nos aeropuerto despues di un periodo di 4 aña di gobernashon, ku PNP ku e kartera di VVRP ainda ta na kategoria 2, esaki debí ku PNP a bin ku un eksperto for di Jamaica ku gobièrnu a paga un bòshi di sèn i ku awe a bai laga nos na e mesun nivel ku e supuesto eksperto aki a bin haña nos aeropuerto. Esaki debí ku no a buska un yu di tera pone komo “counterpart” di e supuesto eksperto aki, e komishon di Parlamento ku lo bai atendé ku e trayekto di EOP lo no kometé e mesun eror ku e minister di VVRP, pa no inkluí yunan di tera den e proseso pa nos yega na un EOP nobo.

Den e trayekto ku e moshon aki ta deskribí, miembronan di Parlamento lo bai envolví ekspertonan lokal pa huntu, no solamente skohe un empresa pa konsehá i yuda, pero tambe pa nan siña mas i fortifiká nan konosementu pa asina e plan nobo di EOP basa riba e FORM BASED CODES (http://formbasedcodes.org/definition/)ta mihó diseñá i nos yunan di tera mes por sigui mantené e desaroyo esaki den futuro. Naturalmente nos ta sali for di punto di bista ku minister di VVRP lo duna su kontribushon i no lo stroba nos ekspertonan lokal partisipá den e trayekto aki.

 

Gerrit F. Schotte

Lider Polítiko di MFK i direktiva

staten

Webmaster

Leave a Reply