• PLAN DI AKSHON
    MFK 2016
  • flag-curacao flag-holanda
Home MFK Awe mundu ta selebrá dia Internashonal di Demokrasia

Na aña 2007, Nashonnan Uni a deklará 15 di sèptèmber komo dia internashonal di “Demokrasia”. 

Awe riba dia internashonal di demokrasia, Movementu Futuro Kòrsou (MFK) kier felisitá pueblo di Kòrsou ku nos por ta bendishoná di ta biba den un País ku esensianan prinsipal pa ta un pais demokrátiko.

Demokrasia ta un proseso dinámiko, ku meskos ku nos kurpa humano mester di awa i kuminda, asina nos demokrasia tambe mester wòrdu pone konstantemente bou di un lupa pa asina nos por perfekshoná nos demokrasia i asina pone nos mes riba e kaminda ku por hiba Kòrsou na un País independiente.

Lamentablemente nos mester tuma nota ku gobièrnunan di turno no a hasi sufisiente pa aktualisá i perfekshoná nos demokrasia. Den e último dies añanan ku a transkurí, nos por a tuma nota ku nos demokrasia tin su defektonan i ku gobièrnunan di turno ta hasi mal uso di leinan ku no ta wòrdu aktualisá pa asina nan mantené nan mes na poder i den gobernashon na lugá di adaptá e leinan aki pa asina garantisá un demokrasia real.

E instituto “International Foundation for Electoral Systems” (IFES), ta un organisashon ku pa e último 3 dékadanan ku a transkurí ta traha ku diferente País pa no solamente mantené nan status di País demokrátiko pero tambe pa aktualisá leinan pa garantisá un demokrasia duradero.

No ta pòrnada MFK a presentá algun aña pasa e proyekto di Reforma kaminda nos a presentá diferente proposishon di kambio pa aktualisá i garantisá ku nos demokrasia ta un bibu i ku ta kubri interes di kada un siudadano di Kòrsou, lamentablemente nos mester tuma nota ku te awe mayoria polítiko ta prefera pa kos keda “status quo”.

Nos di MFK ta kontentu ku awe Kòrsou por selebrá huntu ku otro País nan na mundu dia di Demokrasia. Di di nos parti lo bo por ta sigur pueblo di Kòrsou ku nos lo ta para semper pa ta un País Demokrátiko.

Pabien Kòrsou,

 

Gerrit Schotte

Lider Polítiko i

Miembro di Parlamento di Kòrsou

Willemstad, 15 di sèptèmber 2017

 

Webmaster

Leave a Reply