• PLAN DI AKSHON
    MFK 2016
  • flag-curacao flag-holanda
Home MFK 3 di Novèmber pa 9or di mainta Komishon sentral di Parlamento ta...

Djabièrnè 3 di novèmber, den un reunion di komishon sentral lo trata e proposishon di lei ku Movementu Futuro Kòrsou (MFK) a entrega kaminda ta proponé un adaptashon den e “Wegenverkeersverordening 2000” pa por pega papel (tint) na e glasnan di parti dilanti den banda di un vehíkulo.

Manera MFK ya a informá despues ku otro frakshon ku ya no tei mas den Parlamento a entrega na komienso di 2016, un proposishon di kambio i ku “Raad van Advies” a duna su konseho riba esaki kaba, MFK a adaptá e proposishon aki i entrega esaki di nobo pa wòrdu trata den Parlamento.

Pa nos di MFK tin sufisiente motibu pa a presentá e proyekto di kambio di lei aki, kaminda ta permití pa pone “tint” riba glasnan dilanti den banda te na un máksimo di 40% òf porta 35% di visibilidat den e vehíkulo, pa asina kontribuí na protekshon di e ser humano primordialmente i yuda atende ku e kalor insoportabel.

E kambio ariba menshoná ta kontribuí na;

  • Ta blòkia rayonan Ultra Violet di solo (bo salú)
  • Yuda konserva interior di e vehíkulo
  • Ta mantené gran parti di e kalor for di e parti paden di e vehíkulo
  • E “tint” hasta ta protehé e glas pa no kibra na pida pida ora tin intenshon di horta den e vehíkulo
  • Ta kontribuí na privasidat i seguridat

No por tin ningun argumento pa un mayoria apsoluto bai di akuerdo ku e proposishon di kambio aki, asuntu di kriminalidat no por ta un argumento pa no aprobá e kambio di lei aki, esaki debí ku den praktiká último 9 añanan for di kambio di e lei aki glas transparente òf skur no a baha of subi kriminalidat. Krimininalidat ta subi ora Ekonomia ta paralisá sin niun klase di oportunidat pa avansa den bo pais.

Ta bon pa remarká ku e kambio di lei aki ta keda intakto e restrikshon pa pone “tint” riba e “windshield” parti dilanti, asina ta ku di parti dilanti tin un visibilidat kompleto den e vehíkulo, e 40% òf porta 35% di visibilidat proponé tampoko no ta hasi imposibel ku por mira den e vehíkulo i esun ku ta manehá tampoko e 40% òf porta 35% no ta opstakulisá su visibilidat den tráfiko.

Parlamento dia 3 di November lo debati riba e proposishon di lei aki i pueblo lo por tende kua frakshon tin pensa di no sostené e proyekto di lei aki pa abo, Pueblo.

Kòrsou, 26 di òktober 2017,

Gerrit Schotte

Lider Polítiko i

Lider di Frakshon di MFK

Webmaster

Leave a Reply