• PLAN DI AKSHON
    MFK 2016
  • flag-curacao flag-holanda
Home Charles Cooper Duurtetoeslag MFK – Charles Cooper: Gobièrnu Rhuggenaath ta midi ku dos midi

Pa protehá UTS, ta blok ARC pa kontrolá UTS su sifranan i ta strobanan di bai korte di Kasashon, pa sigui tormenta penshonadonan ku pago di duurtetoeslag, UTS si ta prosedé den “Hoger Beroep” ku bendishon di Gobièrnu Rhuggenaath

Frakshon di MFK na yüni 2016 a saka un karta over di duurtetoeslag di trahadornan di Selikor, na aprel 2017 MFK a saka un komunikado over di e tema aki i awor nos a tuma nota di e sentensia numerá AR 77524/2016, di dia 6 di novèmber 2017. Por sierto un desishon di hues ku hopi hende, penshonadonan i empleadonan aktual, tabata warda riba dje. Tin hopi kompania ku no a paga duurtetoeslag na nan penshonadonan i trahadónan i nan tabata pendiente di kiko hues lo dikta den e kaso aki di UTS vs. APC (Algemeen Pensioenfonds Curaçao), pa nan wòrdu paga.

UTS a anunsiá ku nan lo bai prosedé den “Hoger Beroep”, MFK ta lamentá esaki, mirando e argumentonan ku hues a usa pa yega na su desishonnan. Esaki ta obvio i no ta laga ningun pero ningun duda atras ku e chèns ta praktikamente nulo den “Hoger Beroep”, UTS a pèrdè riba praktikamente tur punto ku nan a trese dilanti den korte.

Ta di lamentá ku Gobiernu resientemente a prohibí Kontrolaria General pa bai korte di kasashon, usando argumento di gastunan haltu di abogado, pa prosedé i asina por drenta den UTS i hasi investigashon ku un mayoria den Staten a aprobá. Pueblo di Kòrsou i trahadónan di UTS merese un bista di kiko realmente direktor di UTS ta hasiendo den e kompania ku tin problema finansiero, ku mester kita 280 trahadó.

Gobièrnu ta akshonista mayoritario den UTS, i aki awor si ta permití pa UTS sigui prosedé den “Hoger Beroep” ku algu asina principieel pa penshonandonan ku ta nan pago di duurtetoeslag i tòg ta skohe pa nan keda den insertidumbre.

Un biaha mas, ta di lamentá ku ta para e kaso di Kontrolaria General argumentando ku e gastunan pa prosedé den korte di kasashon ta demasiado haltu, miéntras ku UTS ta sakudí fundeshi di un ekonomia paralisá ku retiro di 280 empleado mas i ta anunsiá ku ta bai prosedé den “Hoger Beroep” pa ku duurtetoeslag.

Pero ku esaki nos ta mira un biaha mas ku e gobiernu aki no a bin pa traha pa pueblo i gobiernu no tin kunes kuantu yu di Kòrsou mas ta pèrdè trabou i pa kuantu tempu mas lo keda tormenta penshonadonan den nesesidat pa kobra nan duurtetoeslag ku nan tin derechi riba dje konforme lei.

Un gobiernu responsabel ta yama un reunion di akshonista i ta instruí UTS pa drenta den negosiashon ku e grupo ku tin ku kobra e duurtetoeslag pa yega na un formulá pa paga e penshonadonan. Esaki meskos ku UTS ta preparando pa hasi un fiansa milionario na APC pa supuesto invershonnan logá ta pa finansia e afvloeing di 280 trahadó.

Minister presidènt Rhuggenaath, si UTS por a drenta aventuranan finansiero na Sürnam i St. Kitts i den region, kaminda UTS a pèrdè shente di miónes di florin i no ke kontrola esaki, mester por yega na un formulá pa paga penshonadonan loke nan tin derechi riba dje mesora.

Ta e forma di funshoná aki nos mester komprondé for di e título na hulandes di e programa di gobernashon di gabinete Rhuggenaath “Ontplooien van Curacao’s Potentieel” di e forma aki ta bai “Desplegá e Potensial di Kòrsou”, protehiendo amigunan i tormentando penshonadonan?

 

Kòrsou 19 di novèmber 2017

Charles F. Cooper

Miembro di Parlamento

Webmaster

Leave a Reply