• PLAN DI AKSHON
    MFK 2016
  • flag-curacao flag-holanda
Home Gilmar "Pik" Pisas Koalishon ta keda sin firma lista di presensia den Parlamento

E motibu prinsipal ta ku nan no kier a debatí i fiha un posishon pa ku medida tuma dor di gobièrnu pa kòrta 14 mion den fondonan di enseñansa ku ta brinda komunidat su yunan enseñansa aksesisbel i liber

Dia 22 febrüari 2018, Presidente di Parlamento a konvoká un reunion pidi dor di miembronan di frakshon di MFK i tambe frakshon KDNT, ku e tópiko deliberashon ku Minister di Enseñansa, Siensia, Kultura i Deporte enkuanto e situashon di nos klima na Kòrsou, relashoná ku funshonamentu diario di nos institutonan di edukashon.

E petishon aki a wòrdu entrega 21 di sèptèmber 2017. Mester menshoná ku ounke nos Reglamentu di òrdu ta menshoná ku reunion nan pidi dor di minimo 3 miembro di Parlamento mester wòrdu konvoká dentro di 14 dia, lamentablemente presidente di Parlamento despues di 5 luna a konvoká e reunion aki. Pa motibu di e tardansa frakshon di MFK siman pasa a hasi un petishon pa agregá un punto di agenda adishonal “Eliminashon di Enseñansa Liber” ya ku e minister lo tey awe pa atende temanan di enseñansa den sala di Parlamento i esaki lo nifiká reuní efisientemente.

E reunion aki ta wòrdu konsiderá uno di sumo importansia pa e mayornan i e alumnonan na skol ku Gobièrnu 2 siman pasa a tuma desishon i anunsia ku nan lo eliminá enseñansa liber na rason di 14 mion florin ku lo libra pa tapa buraku. E desishon aki a krea pániko sigur den nos komunidat di parti di mayornan ku ta man na kabes ku no sa kon nan lo bai finansiá awor estudio di nan yu den futuro.

Pa bini klaridat di parti di Gobièrnu i pa nos pueblo por komprondé na nòmber di frakshon di MFK, nos frakshon a entregá siman pasa e petishon na Presidente di Parlamento pa miembronan di Parlamento por a debatí awe tambe ku Minister di Enseñansa riba e medida di eliminá Enseñansa liber pa nan spar 14 mion pa por usa pa algu otro. Un medida asin’aki ta devastador mirando kuantu hende ta pèrdiendo nan trabou pa hopi medida desbalansa ku gobièrnu a bini ta tuma den e último 6 añanan.

Ta minando nos demokrasia den Parlamento konstantemente, no tin splikashon i motibu ku reunion nan ku nos ta pidi no opstante ku regla ta ku denter di 14 dia esakinan mester wòrdu konvoká nos tin ehempelnan ku e reunion nan ta dura 8 luna (karni kaduká), 5 luna (salario mínimo) pa wòrdu konvoká.

Mas prueba ku ta sigui mina nos demokrasia i e derechi di yama reunion den Parlamento en partikular di e frakshon nan ku no ta sostene Gobièrno su maneho ta tur e reunion riba tema nan ku karakter di urgensia, te ku awe nan no a wòrdu konvoká. Por ehèmpel subida di prima di seguro W.A. 13.5% di kual petishon a wòrdu entrega 27 novèmber 2017 tambe e reunion pa debatí ku Promé Minister ta kon e la screen un kandidato pa Minister ku e mes a bin disidí komo Minister pa oumenta balor di portafolio di un kompania ku e ta akshonista personalmente den dje (Guardian Group).

Djaweps 22 di febrüari 2018, pa nos sorpresa miembronan di Koalishon konsientemente a keda sin firma pa e reunion a habri. Despues ku presidente Parlamento a yama i a konstatá ku no tin quorum den e promé reunion ku tabata tin yama pa 9:30 am, esaki a wòrdu sera i a konvoká un reunion nobo pa 11 or di mainta. Den e di 2 reunion di 11or am, atrobe nos mester a konstatá ku eksepshon di e miembronan sr.Plet i sra. Mc Williams ku atrobe parlamento no por a forma quorum pa e reunion por a habri.

Mester splika ku oposishon ora nos pidi un reunion nunka nos so lo por yega na un mayoria pa forma quorum paso nos ta obviamente den minoria. Splikashon di ensnan den koalishon ku ta argumenta ku paso tin miembronan di oposishon ku no a bini reunion i p’esei nan no ta firma no tin base ni pia pa para ariba.

Praktikamente tur reunion di Parlamento koalishon tin ku firma pa reunion nan por logra habri sin wak ku tin hende presente di parti oposishon si òf no. Un ehèmpel ta esun resien tokante salario mínimo ku e dia ey tabata falta miembro di oposishon di kual Koalishon mester a firma pa e reunion habri, no opstante ku ta reunion yama dor di oposishon.

E pregunta ta kiko ta e problema ku awe faltando e mesun miembronan di parlamento den oposishon tòg no ta firma pa e reunion por kontinuá. For di ora un reunion wòrdu habri sea ku e sigui òf no e ta kosta nos komunidat entre 17000,- mil pa 22000,- mil florin.

Argumento tambe ku mester di tempu pa prepará pa un reunion ku un tema nobo tampoko no tin balides ya ku na Desèmber 2017, sr. Minister di Finansa Kenneth Gijsbertha a entregá un presupuesto kompletamenete nobo pa aña 2018 riba fecha 18 di desèmber pa esaki wòrdu trata 3 dia despues ku ta 21 di Desèmber. Anto aki tabata trata di un lei di mas di 400 pagina i no un debate riba un tòpiko.

Prohibí pa lubidá!

 

Gilmar “Pik” Pisas

Miembro di Parlamento (MFK)

Kòrsou, 22 di febrüari 2018

Webmaster

Leave a Reply