• PLAN DI AKSHON
    MFK 2016
  • flag-curacao flag-holanda
Home MFK MFK ta di luto ku pèrdida di un gran yu di Kòrsou...

Durante di gobernashon despues di 10 di òktober 2010 a aserka sr. Renny Maduro (q.e.p.d.) pa okupá un funshon den e komisariado di Banko Sentral. Funshon ku Renny a sa di okupá komo debe ser i ku e profeshonalismo ku semper nos a skucha ku e ta apliká den su trabou.

Renny semper a sa di separá polítika for di su trabou i funshon komo komisario den e hunta di komisariado di banko sentral. Esaki tabata resaltá den su forma kulto pero sabio di tuma desishon i motivá e motibunan ku ta hib’e pa tuma e desishonnan korespondiente. Semper dispuesto di duna konseho sea pidi òf di forma boluntario riba tópikonan di interes pa su pais Kòrsou.

No ta un sekreto públiko ku Renny tabata un dosente hopi stima na nos universidat i ku su forma di duna lès tabata un balor agregá pa studiantenan ku tabata forma parti di e fakultat di SEF, no pa solamente su konosementu, pero pa su forma eksepshonal pa por a komuniká ku nos hóben i no pa solamente pa e parti didáktiko, pero tambe pa su forma di motivá i guia nos hóben studiantenan pa nan sali dilanti i desaroyá nan konosementu i talento.

Papel lo ta poko pa nos deskribí kon grandi e kurason, konosementu i kalidat humano di Renny Maduro tabata.

Kòrsou a pèrdè un gran yu i nos ta sigur ku lo e okupá un lugá privilegiá den e bida nobo ku e ta bai biba. Renny danki pa a nifiká asina tantu pa nos komo polítiko i pa nos hóbennan ku ta e futuro di nos dushi Kòrsou.

Movementu Futuro Kòrsou i su lider polítiko señor Gerrit Fransisco Schotte, mediante di e komunikado aki kier manda nos mas sentido pésame en konekshon ku e tristu notisia di fayesimentu di Renny Maduro (q.e.p.d).

Nos kier deseá famianan hopi forsa den e momentunan difísil aki, pa por karga ku e pèrdida di bo(so) miembro di famia. MFK ta ku kombibí ku bo(so) i ta pidi Todopoderoso pa duna Renny sosiegu eterno i ku su bon alma sosegá na pas.

 

Na nòmber di

Direktiva di MFK i

MFK su organisashon kompleto

 

Gerrit F. Schotte

Lider Polítiko

Kòrsou, 22 di mart 2018

Webmaster

Leave a Reply