• PLAN DI AKSHON
    MFK 2016
  • flag-curacao flag-holanda
Home Gilbert Doran Gilbert Doran – MFK: Minister Alcala-Walle (PAR) ke STOP studiamentu den region...

Pa medio di e komunikado aki, mi ke a enfatisá riba e importansia ku gobiernu di Kòrsou tin ku kontinuá brindando posibilidat pa hóbennan ku ke sigui nan estudio den region por hasi esaki.

Pa hasi un komparashon entre studia na Hulanda i studia den region, ta prueba ku sifranan konkreto ku apénas 50% di studiantenan ku a bai studia na Hulanda ta finalisá nan estudio ku éksito, miéntras ku 80% di studiantenan ku bai studia den region ta terminá nan estudio ku éksito.

Aktualmente tin 418 studiante ku ta studiando den region i e repartishon ta lo siguiente: na Merka ta studiando 66%, na Costa Rica ta studiando 12%, na Trinidat & Tobago, Jamaica, Colombia, México, Puerto Rico i Argentina e sobra 22% di e 418 studiantenan.

Segun Minister Alcala-Walle su deklarashon nan duna riba e tema aki i ku resientemente a hasi un biahe pa Boston, e ta konkluí ku studia den region ta demasiado karu pa e studiante òf SSC por kubri esaki, en todo kaso si hasi bishita na e universidatnan di mas karu na Merka porta bèrdat esaki por ta e kaso. Pero gran mayoria di studiantenan ta studiando na siudatnan merikano mas serkano ku un nivel haltu di edukashon i ku ta brinda “scholarship programs” rondó di deporte ku por ehèmpel Hulanda nunka no a desaroyá apart di nan A-status pa atletanan profeshonal, ku ta hopi mas barata ku loke minister Alcala-Walle porta ta usando komo preteksto pa bisa ku region su estudio ta mas karu.

Segun Minister Alcala-Walle, studiantenan den region mester paga hopi sèn bek. Pero e Minister tin ku splika ta dikon mayoria di studiante ku ta bai Hulanda no ta regresá fásil bek Kòrsou, esaki ta pa motibu ku oranan terminá nan estudio ku un edat di entre 21 pa 23 aña, nan tin un debe na DUO i/òf SSC pa un montante di alrededor di 200 mil Euro, kual ta igual na un suma di un hipotek pa awe nan por kumpra/konstruí un kas, i mayoria biaha pa bin bek Kòrsou pa bin gana florin pa paga EURO bek e profeshonal ta opta pa keda Hulanda/Europa gana Euro pa paga su fiansa di estudio bek. Sin realisá ku pa ora e kaba, e eskoho aki ya a marka destino di su bida pa semper na Hulanda/Europa dunando Kòrsou tiki garantia ku nos mihó serebronan ta bolbe bek kas, promoviendo Brain Drain na lugá di Brain Gain.

Ta fresku den nos memoria ku sra. Alcala-Walle mes a lanta un fundashon priva ora ya su organisashon polítiko no a logra dun’e un puesto den funshon aktivo i a disidí pa e meta prinsipal ta pa yuda studiantenan ku nan debe na DUO i wak kon pa suavisá esaki pa asina nan por konstruí un futuro, pero awor komo titular di enseñansa, sra. Alcala-Walle a bòltu 180 grado. Ta bin aserka ku den region e studiante por praktiká su deporte faborito òf arte i hasiendo esaki ku éksito, ku ta kontribuí na un rebaho riba su gastunan di estudio danki na “scholarship programs” den praktikamente tur ramo di deporte ku mundu konosé. Nos no por komprondé kua ta e motibunan real pakiko Minister Alcala-Walle ta trata di tur forma di perhudiká nos hóbennan ku kier studia den region.

Mirando ku no mas ku e siman aki Minister Alcala-Walle mester a hala aden e prohibishon ku e mes a imponé riba e kolegio DiBo, debí ku na momentu ku Alcala-Walle a imponé e prohibishon aki e no a hasi su hùiswèrk komo debe ser i despues ku gerensia di DiBo a mustr’e ku su desishon ta unu inkorekto, Alcala-Walle a hañ’e obligá ta hala aden su desishon deskabeyá i sin un base legal.

Nos tin duda fuerte ku den e tema di studiamentu den region Minister Alcala-Walle ta aktuando di mesun forma deskabeyá manera a atendé e proseso di DiBO. I esaki ta pone nos yega na e konklushon ku Minister Alcala-Walle kier sera portanan den region pa nos studiantenan i kontinuá ku un maneho “Sin Pia ni Kabes” ku ta perhudikando nos hóbennan i e resultado eksitoso ku tur mayor ke pa nan yu tin.
Na nòmber di frakshon di MFK,

Gilbert Doran

Parlamentario Frakshon di MFK

Kòrsou, 8 di aprel 2018

Webmaster

Leave a Reply