• PLAN DI AKSHON
    MFK 2016
  • flag-curacao flag-holanda
Home Gilbert Doran MFK- Doran: FEFFIK ku ta eksisti for di 1980 no mag wòrdu...

No por stòp nos hóbennan di sigui kursonan di Fishi

For di aña 2015 MFK ta vigilando akshon nan di Gobièrno ku ya na varios okashon di un forma of otro ta purbando di sera e instituto aki. Un pais ku un Refineria di kapasidat di mas di 300 mil bari diario i un Dry Dock serando su uniko skol di fishi, un akshon straño? Si na final di dia nan intenshon ta pa sera nos Refineria nos por komprondé e desinteres di MAN,PAR i PIN pa mantene un skol di fishi habri. (http://mfk.cw/blog/2015/01/24/petishon-pa-reunion-di-komishon-sentral-ku-e-punto-di-agenda-welga-na-feffik-i-otro-problemanan-ku-ta-eksisti-na-e-instituto-menshona/)

Teniendo kuenta ku e preokupashon ku ta biba den komunidat pa último añanan pa loke ta trata enseñansa di fishi i e rumornan ku ta sirkulá ku konseho di Minister a tuma e desishon pa dal FEFFIK sera, esaki ta oumentá e preokupashon pa pèrdida di e úniko entidat di Kòrsou ku ta duna kurso di fishi, ta bira hopi mas grandi.

Lógikamente ku ta lanta masha hopi pregunta den kabes di nos hóbennan, esaki debí ku nan ta keda bira víktima di un maneho di enseñansa ku kada bes di nobo ta krea mas opstákulo i ménos perspektiva pa nan. E posibilidat pa nan kai den gara di kriminalidat ta oumentá kada dia mas.

Aparte di nos hóbennan dosentenan tambe lo keda desempleá, esaki ta un preokupashon grandi pa ami komo miembro di Parlamento, ku durante di último aña ku a transkurí mester a tuma nota di kuantu tata i mamanan di famia a pèrdè nan trabou.

Ta fresku ainda den mi memoria e promé bishita ku miembronan di Parlamento ku ta forma e parti di e komishon fiho di enseñansa a hasi despues di a kaba di huramentá dia 11 di mei aña 2017 na FEFFIK. Parlamentarionan ku tabata presente den nan mayoria, tantu di koalishon komo di oposishon a haña henter un dia di presentashon riba e aspektonan finansiero, materia didáktiko i e edifisio kaminda FEFFIK ta ubika.

E demostrashon i splikashon ku e direktor interino a duna, a laga un bon impreshon atras i a ilustrá ku e proseso pa sania e parti finansiero di e skol ta kana den bon direkshon i ku bastante di e debenan ku tabata habrí, ya a wòrdu paga. Na final Parlamentarionan presente a deklará ku FEFFIK ta esensial den edukashon di nos hóbennan den e ramo di fishi i ku FEFFIK tin tur derechi di eksistensia.

Nos ta spera ku e Parlamentarionan ku ta sostené koalishon lo para tras di nan palabra i duna FEFFIK e sosten manera nan a manifestá durante di nos bishita na FEFFIK. Nos mester para duru pa mantené e úniko skol di fishi ku Kòrsou ta dispone di dje habri, no por permití bou di ningun sirkunstansia ku tin ku sera FEFFIK. Nos no por keda importá obreronan di afó pa area di trabou ku ta regarda fishi, miéntras ku nos tin hóbennan ku ta deseá di studia den e ramonan aki.

Nos kier haña klaridat di nos Minister di enseñansa kiko ta e motibunan ku a kondusí na e desishon di konseho di Minister pa sera FEFFIK i tambe kiko ta bai ta futuro di e alumnonan ku ta bishita FEFFIK i maestronan ku ta laborá na e instituto aki.

Na nòmber di frakshon di MFK,

 

Gilbert Doran

Parlamentario Frakshon di MFK

Kòrsou, 22 di mei 2018

Webmaster

Leave a Reply