• PLAN DI AKSHON
    MFK 2016
  • flag-curacao flag-holanda
Home Gerrit Schotte Kiko a bai robes? Un lei ku e mesun kontenido, e diferensia...

Pa straño ku por parse riba e mesun lei dos diferente konseho di “Raad van Advies”, kiko a bai robes?

Frakshon di MFK a adoptá e inisiativa di lei relashoná ku glas di outo skur, ku Frakshon di PNP den persona di eks miembro di Parlamento sr. H. Davelaar a entregá dia 21 di yanüari 2016 pa trese un kambio den e “Wegenlandsverordening” pa asina siudadanonan por tint glas parti dilanti den banda di nan outo pa protehé interior di nan outo i tambe nan salu kontra di rayonan di solo.

E inisiativa di lei ariba menshoná a bai pa “Raad van Advies” (RvA) manera lei ta preskribí pa e konseho nesesario. Na luna di sèptèmber 2017, mirando ku PNP no tin representashon mas den Parlamento, frakshon di MFK a disidí di adoptá e inisiativa di lei aki i hasi e adaptashonnan nesesario konforme e konsehonan di RvA di fecha 21 di yüni 2016 i a entrega e inisiativa di lei aki ku nos frakshon a adoptá i adapta i entregá na Parlamento riba 12 di òktober 2017.

Den un reunion di komishon sentral riba 3 di novèmber 2017, miembronan di Parlamento a debatí riba e inisiativa di lei aki. Despues di e reunion di komishon sentral den Parlamento, RvA pa medio di un karta a mustra presidente di Parlamento riba e omishon ku su persona a kometé i ku e lei aki mester a wòrdu manda RvA di nobo, loke ta masha straño, debí ku ta konsehonan ku a bin di parti di RvA a prosesá den e inisiativa di lei. Presidente di Parlamento a sigui òrdu di RvA i riba 13 di mart 2018 a manda e inisiativa di frakshon di MFK pa RvA.

Grandi tabata e sorpresa pa frakshon di MFK ora nos a tuma nota di e konseho nobo di RvA fecha 22 di mei 2018 riba e inisiativa di lei ku a wòrdu adaptá pa MFK a base di e konsehonan ku RvA a duna riba 21 di yüni 2016 relashoná ku e inisiativa entrega dor frakshon di PNP. E úniko kambio signifikante entre e inisiativa di MFK i esun di PNP ta e porsentahe di e papel ku por wòrdu usa na glasnan dilanti den banda di un vehíkulo di 35% pa 40% ku awe finalemente nos a propone pa e ta 35%.

E konseho risibí e siman aki di RvA ta un kontradikshon kompleto di nan mes konseho emití 21 yüni 2016 riba e inisiativa di lei ku frakshon di PNP a entrega, miéntras ku e esensia adopta i entregá dor di Frakshon di MFK a keda intakto. Ku otro palabra mesun lei i mesun kontenido ta haña dos konseho diferente.

Pa Frakshon di MFK ta un sorpresa pa mira ku RvA den su konseho riba e lei a inkluí praktikamente tur e deseonan ku miembronan di koalishon a pidi durante di e reunion di komishon sentral di 3 di novèmber 2017. Miéntras ku den e konseho di RvA riba e proposishon di PNP, no a pidi tur e investigashonnan aki, awor direpente RvA ta haña den su konseho resien ku ta nesesario pa esakinan wòrdu hasi.

Ku e konseho aki di RvA no ta nesesario pa empleadonan di griffie traha un resúmen di e reunion di Parlamento, debí ku RvA a hasi esaki den su konseho kaba i inkluyendo delaster un opservashon ku miembronan ku ta sostené koalishon a trese dilanti den nan disertashonnan.

MFK den e memo ku ta kompaña e inisiativa di lei a mustra kon gran parti di estadonan na Merka ya ta permití pa hasi uso di papel di tint di 35% i ku esaki na Merka no ta krea ningun sorto di opstrukshonnan ku RvA ta trese dilanti den su konseho. I e kontinente merikano ta analisá, hasi estudio i dokumentá su desaroyonan di tal forma ku si Merka konsiderá ku tintmentu di glasnan pretu lo ta realmente peligros pa trafiko esaki nan lo tin abase di estudionan i esaki no ta e kaso, mayoria estado Merikano den lei ta permití tint glas pretu di outo.

Frakshon di MFK ta lamentá ku esaki ta e forma ku nos mester konstatá ku un identidat mas den nos kadena gubernamental “Hoge College van Staat”, esta RvA ku mester funshoná di un forma independiente i sin intervenshon polítiko, ta mustra ku nan tambe ta “verlengstuk” di gobiernu i ku RvA no por duna konseho di un forma independiente i ophetivo riba un proyekto di lei entrega dor di miembronan di Parlamento ku ta den oposishon.

Di 2 Konseho Raad van Advies riba Lei di Tint – Lv 2017-2018-086 Inisiatiefontwerplandsverordening Wijz Weg… by MFK on Scribd

Quo Vadis Kòrsou

 

Gerrit F. Schotte

Lider di Frakshon MFK

Kòrsou, 29 di mei 2018

 

Webmaster

Leave a Reply