• PLAN DI AKSHON
    MFK 2016
  • flag-curacao flag-holanda
Home Gilmar "Pik" Pisas Gilmar Pisas – MFK: Desempleo vs Kriminalidat, nos ta bayendo bek na...

Gobièrnu ke baha krímen pero no ta kreando kuponan di trabou pa Yunan di Kòrsou, sifranan entrega no ta reflehá e realidat di nos pais

Últimamente mi a tuma nota di diferente establesimentunan i kompanianan ta serando nan portanan, e tendensha aki a oumentá mas for di inisio di e gobernashon aktual. Kompanianan grandi ku hamas nos por a maginá ta serando i hopi hende ta keda desempleá. Sifranan ta mustra ku desempleo na aña 2012 tabata 9%, i esaki a subi barbaramente na 2014 i yega te na 12.6%, na aña 2015 – 11.7%, na aña 2016 – 13.3% i na aña 2017 14.1%. Nos lo mester pone man na nos kurason, debí ku tin tur indikashon ku e di e aña 2018 lo tin un porsentahe devastador.

Un di e medionan pa kombatí kriminalidat, ta dor di krea kuponan di trabou. Mi mester menshoná ku e gobièrnu aki ku tur e promesanan ku nan a hasi ku nan lo ta “ON THE MOVE” i ku nan lo krea kuponan di trabou, lamentablemente nos mester konstatá ku empresanan ta serando nan portanan òf otronan ta bandoná Kòrsou i ta bai establesé nan mes na otro partinan di mundu.

Tur esaki aparte ku e ta trese doló i sufrimentu enorme serka famianan e ta trese tambe subida drástiko di kriminalidat. Sin trabou nos hendenan, pa tristu ku e ta pa mi menshoná, ta mira kriminalidat komo un manera di skapa for di e situashon difísil ku nan ta den.

Resientemente mi a tuma nota ku Minister a presentá e sifranan di kriminalidat i a indiká ku e sifranan ku Minister a presentá ku kriminalidat a baha.

Nos mester ta sinsero ku nos mes, e bahada di kriminalidat a base di e sifranan presentá, no ta reflehá loke nos pais ta bibando aden tur dia. Por a tuma nota ku mas ku den e siman aki malechornan a destruí i hòrta tur èrko for di un edifisio na Rio Canario. Potrètnan den korantnan di vehíkulo pluma i atrako riba turista ta órden di dia. Polisnan ku ta investigá kasonan praktikamente no por mas ku e kantidat di kasonan ku nan tin pa investigá.

Konsekuentemente víktimanan no ta hasiendo denunsia, debí ku nan ta pensa ku nan denunsia no ta wòrdu solushoná. Dos asesinato den ménos ku 24 ora, likidashon ta un tendensia dominante atrobe na Kòrsou awe den aña 2018 i asina por sigui resumí e kasonan di kriminalidat di tur dia.

Papiando ku turismo ta un di e fuentenan di kuponan di trabou mientras 7 hotèl a dal nan porta sera durante e último añanan tras di lomba no ta demostrá niun kompromiso sólido ku e sektor aki, tambe mi mester menshoná ku hopi tiki ta wòrdu hasi pa protehá nos turistanan. Esaki ta daña nos imágen internashonal en grande. Komersiantenan ta hasiendo hopi pa trese turista anto nan tambe ta sintínan bandoná ku nada no ta wòrdu hasi pa duna e turistanan protekshon.

Nos bida nokturno ta morto debí ku nos pueblo tin hopi miedu di bandoná nan kas pa motibu di kriminalidat. Tur esaki ta pone ku nos ta prizonero di nos propio akshonnan, robes.

Gobièrnu mester tuma akshon awor mas ku nunka i ehekutá loke nan a primintí pueblo esta realisashon di e máksimo potensial di Kòrsou, ku aworakí ta netamente kontrali di loke a primintí. No por ta asina ku tur hotèl mester sera promé, tur hende mester pèrdè nan trabou, e hotèl tin ku bai findishi pa e ora ey numa un invershonista ta interesá di hasi negoshi na Kòrsou.

Pueblo di Kòrsou ta eksigí trankilidat anto un di e vehíkulonan pa krea trankilidat i seguridat bek pa pueblo di Kòrsou ta pa krea kuponan di trabou. No opstante di tur e kritikanan den direkshon di e proyekto eksitoso aya na Veeris yama Sambil awe ta un di poko proyektonan ku ta kresiendo stap pa stap firme aportando na e bashí grandi di falta di konfiansa den nos pais, pero esaki no ta sufisiente, mester di hopi mas.

Sali bisa pueblo ki dia kuponan di trabou ta wòrdu krea pa asina trese un bahada real di Kriminalidat pa nos dushi Isla.

 

Gilmar “Pik” Pisas

Miembro di Parlamento – Frakshon di MFK

Kòrsou, 23 sèptèmber 2018

Webmaster

Leave a Reply